ಗಜಲ್೧

 

ನನ್ನೆದೆಯೊಳಗೆ ಹಾಡಿದ ತನನಂ ನಿನಗೆ ಕೇಳಿಸದೇ ಸಖಿ
ಎದೆಯಾಲಿಂಗನವ ಮಾಡಿದ  ಕಿವಿಗಳು ಆಲಿಸದೇ ಸಖಿ

ಮನದಲಿ ಮೀಟುವ ಸ್ವರಕೆ ನಾ ದ್ವನಿಯಾಗಿರಬಹುದು
ಇಂಪನ ಸ್ವರಗಳು ತಂಪನು ನೀಡಿದ ಮೇಲೂ, ಹೃದಯವು ಪ್ರೀತಿಯ ಅರಿಯದೇ ಸಖಿ

ಆಳ ತಿಳಿಯದಿಳಿದು ಸೆಳೆತಕ್ಕೆ ಸಿಕ್ಕು ಮಿಸುಕಾಡುತ್ತಿರುವೆ
ವಿರಾಹಿಯ ಜೀವ ಉಳಿಸಲು ನನ್ನತ್ತ ನೋಟ ಸುಳಿಯದೇ ಸಖಿ.

ಸನಿಹ ಸುಳಿದರೂ ವಿರಹದ ಹಾಡು ಗುನುಗುತ್ತಿರವೆ
ಹೃದಯ ಗಾನದ ಘಂಟಾ ಘೋಷಣೆ ಮೊಳಗದೇ ಸಖಿ

ಉಸಿರೂ ನಿಲ್ಲಲುಬಹುದು..ಅಂದ ಚಂದ ಕುಂದಿ ಮಂದವಾಗಲೂ ಬಹುದು
ನಿನ್ನೇ ಬಯಸುವ ಒಳಮನಸ್ಸಿನ ತುಡಿತ ತಿಳಿಯದೇ ಸಖಿ

ಒಲವಿನೊಲುಮೆಯಲಿ ಪ್ರೀತಿ ಮುತ್ತನಿಟ್ಟ ಈ ಸಂದೇಶ
ಜನ್ಮ ಜನ್ಮಕೂ ಪ್ರೇಮ ಬಂಧನವ ಬೆಸೆಯದೇ ಸಖಿ